რატატუი

რატატუი ფრანგული კერძია. საკმაოდ გავრცელებული და პოპულარულია ხმელთაშუა ზღვის სანაპიროზე. რატატუის ხშირად იყენებენ გარნირად, თუმცა ძირითად კერძადაც შეგიძლიათ მიირთვათ. მისი მომზადების რამდენიმე ვარიანტი არსებობს- ზოგი ცალკე ამზადებს პომიდვის სოუსს, რომელშიც ხახვსა და ნიორს ამატებს. ზოგი კი ყველაფერს ერთად ურევს. მე პირველ ვარიანტს გთავაზობთ, რომელიც ვიზუალურად ბევრად უკეთესია.

დაგჭირდებათ:

• 2  დიდი  ყაბაყი
• 1 დიდი ბადრიჯანი
• 1 ბულგარული წიწაკა
• ნახევარი თავი ხახვი
• 2 კბილი ნიორი
• 250 გ. პომიდორი
• მარილი, პილპილი გემოვნებით
• 2 ს.კ. ზეითუნის ზეთი
• 1/2 ჩ.კ. ქონდარი

მომზადება:

• პომიდორს გააცალეთ კანი, დაჭერით და ბლენდერში მოათავსეთ. ხახვი და ნიორიც დაამატეთ და დააბლენდერეთ. ბოლოს დაუმატეთ 1ს.კ. ზეითუნის ზეთი, მარილი და პილპილი. 
• ცეცხლგამძლე ფორმას წაუსვით ზეთი და პომიდვრის პიურე გადაიტანეთ.
• ყაბაყი, ბადრიჯანი და თესლგამოცლილი ბულგარული წიწაკა თხლად დაჭერით. ერთმანეთის მონაცვლეობით ჩააწყვეთ ფორმაში, ისე როგორც ფოტოზეა.

• მოაყარეთ ქონდარი, მარილი და პილპილი გემოვნებით. მოასხით დარჩენილი 1 ს.კ. ზეთი.

• შედგით 190 გრადუსზე გაცხელებულ ღუმელში. აცხვეთ 45-55 წუთი. როცა ბოსტნეული გამოცხვება, მზადაა.