სოკოს ღვეზელი ლავაშით

როგორც დაგპირდით მარხვის პერიოდში ვეცდები ბევრი რეცეპტი შემოგთავაზოთ კატეგორიაში "სამარხვო". ერთ-ერთი ეს ღვეზელია, უგემრიელესია. ვერ გეტყვით რომ მალე მოამზადებთ, თუმცა ღირს გაკეთება. კარგი არჩევანია ლანჩისთვის, სამსახურში ან სასწავლებელში წასაღებად. მე გამოვიყენე ხის სოკო. ვფიქრობ, ქამა სოკოთიც კარგი გამოვა.

დაგჭირდებათ:

• 1 კგ. ხის სოკო
• 2 ცალი მოხარშული კარტოფილი
• 2-3 თავი ხახვი
• 3 კბილი ნიორი
• 5 ღერი კამა
• 5-6 ს.კ. სამარხვო მაიონეზი
• 3 ჩ.კ. წყალი
• მარილი, პილპილი გემოვნებით
• 1+1/2 ჩ.კ. უცხო სუნელი
• 1 ჩ.კ. დაფქული ქინძი
• 4 ცალი ლავაში
• ზეთი

მომზადება:

• გაარჩიეთ სოკო, კარგად გარეცხეთ და მოხარშეთ. შემდეგ გადაავლეთ ცივი წყალი და წვრილად დაჭერით.
• ხახვი და ნიორიც წვრილად დაჭერით და ზეთიან ცხელ ტაფაში მოშუშეთ. დაამატეთ სოკო და განაგრძეთ მოშუშვა. 
• გახეხეთ მოხარშული კარტოფილი და სოკო როცა კარგად მოითუშება დაამატეთ. აურიეთ და რამდენიმე წუთში მოაყარეთ მარილი, პილპილი, უცხო სუნელი და ქინძი.
• აურიეთ და რამდენიმე წუთში გადმოდგით ცეცხლიდან.
• პატარა ჯამში მაიონეზი და წყალი აურიეთ, დაამატეთ ცოტა მარილი, პილპილი და წვრილად დაჭრილი კამა. კარგად აურიეთ.
• თითოეული ლავაში შუაზე გაჭერით. წაუსვით მაიონეზის სოუსი, დაადეთ სოკოს შიგთავსი და გადაახვიეთ. ბოლოს დაატოსტერეთ.